A oes angen cais rheoliadau adeiladu ar gyfer fy ystafell wydr?
Project type
Mae rhai projectau adeiladu cartref wedi'u heithrio rhag y rheoliadau adeiladu a does dim angen cymeradwyaeth, ac mae hyn yn cynnwys rhai ystafelloedd gwydr.
(D.S. Hyd yn oed os yw'r gwaith wedi'i eithrio, mae'n bosibl y bydd angen caniatâd cynllunio felly holwch eich adran gynllunio leol. Dylech chi hefyd gael gwybod a yw eich tŷ'n rhestredig, mewn ardal gadwraeth neu mewn parc cenedlaethol gan y gallai fod angen cymeradwyaeth neu ganiatâd arall.)
Ystafelloedd gwydr eithriedig
Bydd ystafell wydr yn eithriedig os yw'n bodloni'r canlynol:
- Arwynebedd llawr heb fod dros 30m2 yn fewnol (os yw'n fwy na hyn caiff ei thrin fel estyniad).
- Waliau, drysau neu ffenestri o ansawdd allanol yn ei gwahanu oddi wrth y prif gartref. (Bydd y drws allanol yn atal colledion gwres gormodol o'r annedd mewn tywydd oer ac yn atal gorboethi mewn tywydd cynnes.)
- Ar lefel y ddaear.
- Wedi'i gwresogi'n annibynnol, h.y. chewch chi ddim defnyddio eich system gwres canolog i'w gwresogi, ond cewch chi ddefnyddio gwresogydd wedi'i blygio yn y wal.
Os bydd eich ystafell wydr yn bodloni'r gofynion hyn i gyd, mae'n debyg y bydd yn eithriedig ac ni fydd angen i chi wneud cais rheoliadau adeiladu. Os oes gennych chi amheuon, siaradwch â thîm rheoli adeiladu eich awdurdod lleol. (Defnyddiwch y blwch chwilio uchod i gael eu manylion cyswllt uniongyrchol.)
Pryd bydd angen cymeradwyaeth rheoliadau adeiladu
- Os yw'n methu â bodloni unrhyw un o'r amodau eithrio.
- Os ydych chi'n adeiladu ystafell wydr cynllun agored â gweddill eich cartref, bydd angen cymeradwyaeth rheoliadau adeiladu. I gael cymeradwyaeth, bydd angen i chi ddangos bod yr ystafell wydr yr un mor effeithlon o ran egni â gweddill eich cartref.
- Os ydych chi'n bwriadu cynnwys sinc neu blymwaith arall, fel peiriant golchi neu doiled yn eich cynlluniau ystafell wydr.
Hefyd, i adeiladu agoriad newydd rhwng y tŷ a'r ystafell wydr bydd angen cymeradwyaeth rheoli adeiladu.
Yn gyffredinol, rhaid adeiladu ystafelloedd gwydr o waliau a thoeau sy’n dryleu gan fwyaf ac os ydynt wedi'u hadeiladu'n gyfan gwbl neu'n rhannol o wydr, mae angen i'r gwydr fodloni gofynion rheoli adeiladu Dogfen Gymeradwy K.
Dylai gwydrau, yn enwedig ar lefel isel mewn drysau neu mewn ffenestri sydd wrth ymyl drysau fod yn wydr gwydn neu wydr diogelwch. Eto, mae'r gofynion ar gyfer gwydr diogelwch ar gael yn Nogfen Gymeradwy K.
Nodiadau am ystafelloedd gwydr
Ddylai ystafell wydr ddim atal mynediad i ffenestri dihangfa dân.
Os oes llawer o wydr ynddi (ffenestri, drysau a/neu oleuadau to) efallai y bydd angen cyfrifiadau thermol i brofi na fydd colledion gwres a chynnydd solar (y tymheredd yn codi oherwydd pelydriad solar) yn ormodol. Efallai y gofynnir i chi am gyfrifiadau adeileddol i brofi bod adeiledd yr adeilad yn ddigonol a'i fod yn gallu gwrthsefyll llwyth eira.
Gellir adeiladu sylfeini a lloriau ystafelloedd gwydr eithriedig mewn amrywiaeth o ffyrdd, ond mae angen ystyried amodau’r ddaear, coed a draeniau sy’n bodoli i osgoi ymsuddiant.
Mae'n arfer da cynnwys inswleiddio i'w gwneud yn haws gwresogi'r ystafell wydr.
Dylai ystafelloedd gwydr sydd wedi’u hadeiladu o uPVC fod â fframiau â marciau Safon Brydeinig (BSEN 126908 a/neu BS7412) i wneud yn siŵr eu bod yn ddigon cryf i gynnal pwysau’r to.
Fel rheol, bydd angen trin ystafelloedd gwydr pren drwy daenu staen neu olew arnynt.
Rhagor o wybodaeth
